Sracfhéachaint ar ár ráiteas beartais airgeadaíochta - Aibreán 2024

Cad a chinneamar?

Ní dhearna muid athrú ar bith ar ár n-eochair-rátaí úis

Tá a leibhéil reatha ag cuidiú le boilsciú a ísliú. Má thugann an t-eolas atá ag teacht isteach níos mó muiníne dúinn go bhfuil an boilsciú ag bogadh go dtí ár sprioc 2% ar bhealach inbhuanaithe, seans nach mbeidh orainn na rátaí úis a choinneáil chomh hard agus atá siad anois. Ach beidh ár gcinntí ag brath ar an gcaoi a mbreithnímid an cás bunaithe ar an eolas nua a fhaighimid le himeacht ama.

Cad atá ag tarlú sa gheilleagar?

Tá an geilleagar fós lag, ach ba chóir go dtéarnódh sé níos déanaí sa bhliain

De réir mar a thagann laghdú ar bhoilsciú agus méadú ar phá, beidh níos mó airgid le caitheamh ag daoine. Agus an geilleagar domhanda ag téarnamh, is mó easpórtáil a dhéanfaidh gnólachtaí. Tacóidh an méid sin go léir lenár ngeilleagar.

Tá ag éirí go maith le seirbhísí i gcónaí

Bíonn daoine fós ag caitheamh airgid ar sheirbhísí, amhail taisteal agus bialanna. Ach tá éileamh íseal ar earraí ag gnólachtaí monaraíochta agus tá táirgeadh níos lú á dhéanamh acu – go háirithe in earnálacha ina n-úsáidtear a lán fuinnimh.

Tá laghdú ag teacht ar bhoilsciú i gcónaí

Níl ardú chomh láidir céanna ar phraghsanna earraí ná ar phraghsanna bia a thuilleadh. Tá praghsanna fuinnimh níos ísle ná mar a bhí bliain ó shin. Ach tá praghsanna ar sheirbhísí ag méadú go mór.

Tá ardú fós ag teacht ar phá, ach níl an t-ardú chomh géar agus a bhí cheana

Bíonn costais níos airde i gceist do chuideachtaí nuair a bhíonn pá níos airde le híoc le hoibrithe. Ach in ionad méid iomlán na gcostas sin a chur ar aghaidh chuig custaiméirí i bhfoirm praghsanna níos airde, tá brabús níos lú á dhéanamh ag gnólachtaí.

Níl an oiread iasachtaí á dtógáil amach ag gnólachtaí

Tá iasachtaí níos costasaí mar gheall ar rátaí arda úis, agus mar sin tá gnólachtaí ag gearradh siar ar a gcuid pleananna maidir le hinfheistíocht nua.

FÉACH FREISIN